3.000 familia-mediku baino gehiago Oinarrizko Arretari buruz eztabaidatzen arituko dira Bilbon aste honetan
- bideoak
- argazkiak
Bilboko Euskalduna Jauregian, gaurtik datorren ostiralera arte, Espainiako Familia eta Komunitate Medikuntzaren Sozietatearen XXXII. Biltzarra (semFYC) egingo da. Aurten, ‘Igo zaitez’ lelopean, jardunaldiak gaixo kronikoen arreta, frogetan oinarritutako medikuntza eta teknologia berriek medikuaren eta gaixoaren arteko harremanean duten papera izango ditu ardatz gisa. Gaur goizean, topaketa aurkezteko prentsaurrekoa egin da, eta bertan izan dira arloko bost pertsonaia garrantzitsu.
Susana Martín Antolamendu Batzordearen buruak hitz egin du lehenbizi. Ondoren, Espainiako Familia eta Komunitate Medikuntzaren Sozietatearen (semFYC) burua, Josep Basora; Euskadiko Familia eta Komunitate Medikuntzaren Sozietatearen (Osatzen) presidentea, Rafael Gracia; Batzorde Zientifikoaren burua, Rafael Rotaeche; eta Rochester-eko Mayo Klinikako endokrinologoa, Víctor M. Montori, mintzatu dira.
Datozen egunetan eztabaidatuko diren gaietako bat informazioaren eta komunikazioaren teknologiena (IKT) izango da. Rafael Rotaeche doktorearen hitzetan, “ezagutza baliabide berri horien bitartez kudeatzea funtsezkoa da familia medikuntzan aritzeko IKTek aukera berriak ematen dituzte medikuaren eta gaixoaren arteko komunikaziorako, baita herritarren osasun-arazoen aurreko osasun-arretarako ere; baina, osasunaren munduan sartzen den edozein berrikuntza bezala, zorrotz ebaluatu behar da".
Gaur arratsaldean egingo da biltzarrari hasiera emango dion hitzaldia, eta, bertan, Víctor M. Montorik ‘ahal bezain eragozpen gutxi eragiten duen medikuntza' izango du hizpide.
Berri honen iruzkinen RSSa