Lehendakariak Twitter-elkarrizketa berri baten bidez erantzun die herritarrei
Terrorismoaren amaiera, estatutuaren garapena, egoera ekonomikoa, gobernu zentralaren aldaketa edo alderdi pertsonalak izan dira, batez ere, herritarren galderen gaiak
Eusko Jaurlaritzaren buru denetik, laugarren zuzeneko elkarrizketa egin ahal izan diote Patxi Lopez lehendakariari herritarrek. Aldian behingo hitzordu horren eskutik, hauxe gauzatu nahi du lehendakariak: Euskadiko administrazioa herritarrengan hurbiltzeko konpromisoa, batez ere nahi dutenek zuzenean, bitartekaririk gabe, luzatu diezazkioten zalantzak edo galderak. Oraingo honetan, Gernikako estatutuaren garapena, José L. Rodríguez Zapaterok gobernuan egin berri duen aldaketa eta krisi ekonomikoaren amaiera izan dira 18:00etan Twiter gizarte sarean konektatuta zeudenen galderen gai nagusiak, baita galderak aldez aurretik Irekia herritarren parte-hartzerako webgunean utzi dituztenenak ere.
Arrate Fernández izan da lehendakariaren estreinako erantzuna jaso duen internauta. Laugarren Twitter-elkarrizketa izan da lehendakari denetik. Aldian behingo hitzordu horren bidez, Lehendakaritzaren ateak zabaltzen dizkie lehendakariak euskal herritarrei “sarean”. Elkarrizketak agerian utzi du herritarrek bai afera politikoetan bai gizarte arloetan zein lehendakariaren beraren alderdi pertsonaletan duten interesa. Internautek gaurkotasun-albisteetan izan dute interesa, zehazki. Izan ere, estreinako galdera ezker abertzalearen ingurukoa izan da, hurrengo udal hauteskundeetan parte hartuko duen galdetuta. "Ezker abertzalearen munduari eskatzen zaiona gainerako alderdiek betetzen dugun zerbait da", esan du berriro lehendakariak. “Euren ardura da” hauteskundeetan egotea edo ez egotea azpimarratu du. "Hauteskundeetan aurkeztu nahi badute eta politika egin, badakite zer egin behar duten, eta eurek egin behar dute”, gaineratu du.
Horrez gain, Eusko Jaurlaritzak “irmotasun demokratikoan” eta terrorismoarekiko “tolerantzia ezan” oinarritutako politikarekin jarraituko duela gehitu du. Oraingoa aldi egokia ote den Gernikako estatutua ospatzeko galdetu diote, eta lehendakariak estatutuak “berdinen modura bizi nahi duten desberdinen arteko hitzarmen” gisa jokatu duen papera aldarrikatu du. Ibarretxe lehendakariordea Lehendakaritzan egindako ekitaldira agertu ez izanaz galdetuta (doktore-tesia defenditzen ari zen Donostian), lehendakariak atsekabea erakutsi du Ibarretxek 'Ibarretxe plana' berreskuratu duelako (honelaxe definitu du plana: “porrot egindako” ekimena, "frentismoa" bultzatzen duena), Gernikako estatutuak sinbolizatzen duen “elkargunearekin” bat egin ordez.
Udalak, adinez nagusi
JSAlava internautak Udal legearen zirriborroa jarri du mahai gainean, joan den ostiralean aurkeztutakoa, udalei zer ekarriko dien jakin nahirik. "Adinez nagusia dira udalak jada", erantzun du lehendakariak, lege berriak finantza autonomia emango diela udalei eta eskuduntzak argituko dituela azalduta. "Unea heldu da norberak bere burua erakusteko, baita esateko ere eskuduntzak eta baliabideak lagatzeko prest dagoen ala ez”, azpimarratu du.
Horrez gain, Eusko Jaurlaritza aurrera eramateko prest dagoela iragarri du. Elkarrizketak iraun duen ordu erdian zehar, José Luis Rodriguez Zapaterok gobernuan egindako azken aldaketez ere galdetu dute internautek. Zehazki, lehendakaria bere kabinetean antzeko zerbait egitea pentsatzen ari den galdetu diote. Lehendakariak sailburuen eta administrazioko langile guztien kudeaketa defendatu du, eta hauxe ziurtatu du: “Euskadik duen gobernuarekin poz-pozik nago”.
Gaurkotasun-gaiekin eta politikarekin jarraituz, hurrengo autonomia hauteskundeetan, baita hauteskunde orokorretan ere, izango duen balizko aurkariaz ere galdetu dio mikelotaegi internautak. Lehendakaria begirunetsu agertu da beste alderdien barne prozesuekiko, eta erabat baztertu du gobernuko presidentea izateko lehiatzeko aukera.
Euskara, etxebizitza eta tabakoaren legea
Politika alde batera utzita, herritarren galderek intereseko beste alderdi batzuk ere jorratu dituzte. Elkarrizketan zehar, eta aldez aurretik Irekia webgunean, galdera ugari egin dira euskaraz, eta horietako batzuek zalantzan jarri dituzte lehendakariaren hizkuntza aurrerapausoak. "Euskara eskolatik nator, hain zuzen", aitortu du Lópezek, eta Sustatu bezalako blogen lana aintzat hartu du.
Hurrengo galderak bai gizarte arloko ardurak bai alderdi pertsonalak ukitzen ditu. Izan ere, tabakoaren lege berriaz galdetu dio Netoratón internautak, eta hori ez ote den “kontraesana” (legeak eremu publiko guztietan erretzea debekatzen du, eta lehendakaria erretzailea da). "Norberaren apetek ezin dute inoiz izan arrazoi politika egiteko; horren gainetik, herritarren osasuna dago, baita erretzen ez dutenekiko errespetua, eta ez horrenbeste ni erretzailea izatea edo ez”, esan du lehendakariak, erretzeari uzten hasi dela aitortuta. Etxebizitzarena izan da internauten beste kezka bat. Lehendakariaren aburuz, alokairua izan daiteke gazteak independizatzen hasteko modua, eta Eusko Jaurlaritzak horren aldeko “apostu” sendoa egingo duela gaineratu du.
Lehen Twitter-elkarrizketa (2009-08-14)
Deskargak
- Audioak
- Bideoak (1)
- Argazkiak (4)
Politikariak
Beste gonbidatu batzuk
- Lehendakaria
Berri honen iruzkinen RSSa