FICOD-ek Open Data Euskadi saritu du duen berrikuntza eta originaltasunagatik
- bideoak
- argazkiak
Eusko Jaurlaritza izan zen aurreko apirilean berak dituen datu publikoak Interneteko atari espezifiko batean eskaintzen dituen Espainiako lehenengo administrazioa
Open Data Euskadi proiektua FICOD sarien laugarren edizioan saritua izan da. Sari hauek Eduki Digitalen Nazioarteko Foroari lotuta daude. Hain zuzen ere, Herritarrentzako Zerbitzuen Proiekturik Onena izeneko kategorian izan da saritua. Telekomunikazioen eta Informazioaren Gizarterako Estatu idazkari Bernardo Lorenzo Almendros jaunak saria eman dio Funtzio Publikoko sailburuordea den Elena Pérez Barredo andreari gaur arratsaldean Madrilgo Juan Carlos I Kongresuetako Udal Jauregian egin den ekitaldian.
Horrela, Industria, Turismo eta Merkataritza Ministerioak Eusko Jaurlaritza eta datu publikoak zabaltzeko eta berrerabiltzeko beronen zerbitzua nabarmendu egiten ditu eduki digitalen alorreko erakunde eta ekimen berritzailenen eta originalenen artean. Hain justu ere, Herritarrentzako Zerbitzuen Proiekturik Onena izeneko kategoriak edukiak sortzeko baita hezkuntza, osasuna, sustapen turistikoa, nagusiei laguntza eta antzeko alorretako zerbitzu publikoak hobetzeko ere eduki digitalak era berritzailean erabiltzen dituzten proiektuak aukeratzen ditu.
Eduki Digitalen Nazioarteko Foroa Informazioaren Gizartea garatzeko eta Europarekiko konbergentziarako Avanza2 Planaren barruan kokatzen da. Edukien industria osoko zuzendari eta profesionalak biltzen ditu baita gobernu eta herri administrazioetako zein alorreko erakunde eta elkarte esanguratsuenetako ordezkariak ere.
Eusko Jaurlaritza izan zen aurreko apirilean berak dituen datu publikoak Interneteko atari espezifiko batean eskaintzen dituen Espainiako lehenengo administrazioa. Horrela, Sektore Publikoaren Informazioa Berrerabiltzeari buruzko 37/2007 Legea bete du (2003/98/EE Zuzentarauari gainjartzen zaio lege hori) eta Gobernu Irekiaren ereduranzko joera gauzatu du.
Open Data Euskadi zerbitzua Justizia eta Herri Administrazio Sailaren mendeko Herritarrei Arreta Emateko Zerbitzuak darama eta Eusko Jaurlaritzaren datu publikoak eskuratzeko http://opendata.euskadi.net atarian gauzatzen da. Sektore infomediarioaren parte-hartzea izan duen sail arteko proiektu baten erakusleihoa da; Jaurlaritzak sustatzen dituen gardentasun, parte-hartze, zerbitzu eta eraginkortasunaren balioak agerian uzten ditu, eta erregistro publikoetarako sarbidea izateko eskubidea eta datu pertsonalen babesa uztartzen.
Open Data Euskadik, pribatutasun-, segurtasun- eta jabetza-murrizketarik gabeko datu publikoak erabiliz ezagutu eta eraikitzeko gonbitea egiten du. Informazioa behin eta berriz erabili daitezkeen formatuetan eskaintzen du, jabetza-lizentzia irekien pean. Lizentzia horiek aukera ematen dute datuak helburu komertzialekin banatu eta ustiatzeko. Irekieraren helburuak, balioa eta aberastasuna sortzea (hirugarrenen berrerabileraren bidez), gardentasuna sustatzea (kudeaketa publikoa aztertu eta ebaluatzeko balio baitu) eta administrazioen lankidetza erraztea dira.
Datu-katalogoa zazpi kategoriatan egituratu da: datu estatistikoak, geografikoak, meteorologia-datuak, turistikoak, hizkuntzakoak, trafikokoak eta laguntzak, kontratazioak eta beste administrazio-prozedura batzuk. http://opendata.euskadi.net atariak hainbat motatako edukiak biltzen ditu: EAEko argazkiak, estazio meteorologikoetan bildutako informazioa, balio erantsi industrialaren bilakaera eta Euskadiko upategi eta ostalaritzako lokalen zerrenda.
Berri honen iruzkinen RSSa