Bigarren Ertzaintza Eguna ospatu da gaur Arkauten

Arkauteko Polizia Ikastegian (Araba) ospatu da Ertzaintza Eguna. Ekitaldian Patxi Lopez lehendakaria izan da eta euskal poliziako kideen eguneroko lanari omenaldia egin diote, baita euskal gizarteari polizia lanaren nondik norakoak ezagutzeko aukera eskaini ere. Zerbitzuan nagusitu diren agenteei kondekorazio desberdinak eman dizkiete, zendutako agenteak gogoratu dituzte eta aurten erretiroa hartu duten ertzainei euren lana eskertu diete. Lehendakariaren esanetan “pixkanaka-pixkanaka askatasuna finkatzen ari gara Euskadin, intolerantzia gero eta baztertuago dago herri honetan eta hau guztia zuen meritua da”. Halaber, ETAren “azken kapitulua” idazten ari dela adierazi du.

Patxi López lehendakariak “elkarbizitza demokratikoa ezartzeko garaia” heldu dela esan du gaur , eta hau, “memoria eta egiaren bitartez izango da, edo ez da izango”, esan du.

Arkauten (Araba) ospatu da gaur Ertzaintzaren Eguna. Lehendakaria eta Rodolfo Ares Herrizaingo sailburua ekitaldiaren buru izan dira. Bertan, lehendakariak onartu egin du urte askotan Ertzaintzak "jende gehiegiren axolagabetasunaren erdian" lan egin duela, baina hitza eman du "ez direla gehiago bakarrik sentituko", izan ere, "euskal gizartearen parte garrantzitsua dira".

Ertzaintzaren Egunaren bigarren edizioan, instituzio honetako kide guztiak omendu dituzte, erakundeen eta euskal gizartearen babesa eta laguntza helaraziz askatasunen eta herritarrren eskubideen defentsan egindako lanagatik.