2012(e)ko Martxoak 26
65
Eusko Jaurlaritzak Irekiaren softwarea eskaini du Gardentasuna sustatzeko
- bideoak
- argazkiak
Herritar baten proposamenari jarriki, eta Estatuko Gardentasun Legearen kontsulta publiko elektronikorako fasea hasi dela-eta, Irekiak bere tresnak (berrerabilgarriak eta estandar irekidunak) eskaini dizkio Gobernu zentralari
Eusko Jaurlaritzak gaur Gobernu zentralak estatuko Gardentasun Legearen proiekturako ekarpenak jasotzeko sortu duen esparruan horrekin lotutako ekimen bat aurkeztu du. Ekimena Iñigok planteatu zuen, Irekiaren bidez Eusko Jaurlaritzari “Irekiaren eredua maila nazionalean aplikatzea eskaintzeko” eskatu zion herritar batek, hain zuzen.
“Nire ustez, hau aukera ona da Eusko Jaurlaritzak gobernu zentralari bere Gobernu Irekiko eredua eskaintzeko eta, zehazki, Irekiaren eredua eskaintzeko, bikaina izango litzateke-eta maila nazionalean aplikatzea. Eusko Jaurlaritzak bere proiektua beste toki batzuetan (Espainiaren barruan eta kanpoan) martxan jar dadila lortu duela kontuan hartuz, Espainiako Gobernuan aplikatzea oso positiboa izango litzateke ataria eta sistema legealdi honetaz haraindi mantentzeko eta hobetzeko”, erantsi du Irekian planteatutako proposamenean.
Handik gutxira, hamar egunez estatuko lege-proiekturako ekarpenak eta oharrak jasotzeko erabiliko den formularioaren bidez, Irekiak herritar horren proposamena bideratu zuen eta aukera hori planteatu zuen. Era berean, Irekiak ongi etorria egin dio Gobernu zentralari Gobernu Irekiaren mundura sartu dela eta.
“2009an Barack Obamak AEBko gobernura iritsi zenean ireki zuen bidearen ildotik, Eusko Jaurlaritzak Lehendakaritzara zuzenean adskribatutako Gobernu Irekirako eta Interneteko Komunikaziorako helbide propioa ireki zuen, eta, harrezkero, gobernu autonomiko batek baino gehiagok egin du bat aldaketarekin Euskadiko Open Government ereduan oinarrituz, Nafarroako gobernuak eta Gaztela eta Leongoak, besteak beste. Gero eta gehiagok bide hori hartzea espero dugu”, adierazten da proposamenarekin batera helarazi den testuan.
Urrian lehendakariak akordio bat sinatu zuen Amerikako Estatuen Erakundearekin herrialde horretako pertsona guztiek Irekiaren kode irekia erabili ahal izateko. Herritarrek legeen eta dekretuen zirriborroak lantzeko prozesuan parte hartzeko sortutako lehenengo 2.0 tresnetako bat da.
Mundu anglosaxoitik kanpo Open Data programa bat plazaratu duen lehenengo gobernua izateaz gain, Eusko Jaurlaritza, bere gardentasun-politikaren barruan, kontratazio publikoaren datuak masiboki analizatzeko liberatu zituen lehenengo autonomia erkidegoa izan zen. Harrezkero, Balearretan soilik egin dute gauza bera. Autonomia erkidegoko aurrekontuak ere Open Data formatuan daude eskuragarri.
Patxi López lehendakariak, aditu eta aktibista digitalekin egindako topaketa batean, otsailaren erdialdean iragarri zuen Eusko Jaurlaritzak bere Gardentasun Lege propioa sustatuko duela. 2009tik erdietsi diren lorpenak finkatzeaz gain, Gobernuak aurrera egiten jarraitu nahi du, eta, ondorioz, legealdiaren azken garaian Open Governmentaren eskutik jaio den 2.0 gizartea indartzeko egingo du lan, bere potentzial guztia gara dezan.
“Aro-aldaketa baten aurrean gaude”, azpimarratu zuen lehendakariak, “eta lege honek aldaketa horretara nola igarotzen den erakutsi behar du”. Hori dela eta, bertaratuekin testua adituekin eta herritarrekin lankidetzan egitea adostu zuen, eta udaberrian egingo den beste topaketa batekin amaituko da prozesua.
Berri honen iruzkinen RSSa